ಅಧ್ಯಯನಾಂಗ-old

ಅಧ್ಯಯನಾಂಗ ಇತರೆ ವಿಶ್ವವಿದ್ಯಾಲಯದ ರೀತಿಯಲ್ಲಿ ಪರೀಕ್ಷಾ ಕೆಲಸವನ್ನು ನಿರ್ವಹಿಸುವ ಪರೀಕ್ಷಾಂಗವಾಗಿದೆ. ಜೊತೆಗೆ ಶೈಕ್ಷಣಿಕ ಚಟುವಟಿಕೆಗಳನ್ನು ನಿರ್ವಹಿಸುವ ವಿಭಾಗ. ಸಂಶೋಧನೆ, ಅಧ್ಯಯನ, ಪ್ರಧಾನ ಚಟುವಟಿಕೆಯಾಗಿರುವ ಕನ್ನಡ ವಿಶ್ವವಿದ್ಯಾಲಯದಲ್ಲಿ ಮುಖ್ಯವಾಗಿ ಭಾಷೆ, ಸಮಾಜವಿಜ್ಞಾನ, ಲಲಿತಕಲೆ ಹಾಗೂ ವಿಜ್ಞಾನ ನಿಕಾಯ ಎಂಬ ನಾಲ್ಕು ನಿಕಾಯಗಳು ಕಾರ್ಯನಿರತವಾಗಿವೆ.

ಈ ನಾಲ್ಕು ನಿಕಾಯಗಳಲ್ಲಿ ಬರುವ ಅಧ್ಯಯನ ವಿಭಾಗಗಳ ಮತ್ತು ಮಾನ್ಯತಾ ಕೇಂದ್ರಗಳ ಸಂಶೋಧನ ಚಟುವಟಿಕೆಗಳನ್ನು ರೂಪಿಸುವ ಹಾಗೂ ನಿರ್ವಹಿಸುವ ಜವಬ್ದಾರಿಯನ್ನು ಹೊಂದಿದೆ. ಅಧ್ಯಯನಾಂಗದ ವ್ಯಾಪ್ತಿಯಲ್ಲಿ ಬರುವ ಅಧ್ಯಯನ ವಿಭಾಗಗಳು ಕನ್ನಡ, ಕರ್ನಾಟಕದ ಕಲೆ, ಸಂಸ್ಕೃತಿ, ಭಾಷೆ, ಸಾಹಿತ್ಯ, ಚರಿತ್ರೆ, ರಾಜಕೀಯ, ಆರ್ಥಿಕ, ಸಮಾಜ, ಸಮುದಾಯ, ಶಿಕ್ಷಣ, ವೈಜ್ಞಾನಿಕ ಮುಂತಾದ ವಿಷಯಗಳಲ್ಲಿ ಅಧ್ಯಯನವನ್ನು ಕೈಗೊಳ್ಳತ್ತಲಿವೆ.

ಶೈಕ್ಷಣಿಕ ವೇಳಾಪಟ್ಟಿ : 

೨೦೧೭-೧೮ನೇ ಶೈಕ್ಷಣಿಕ ಸಾಲಿನಲ್ಲಿ ಕನ್ನಡ ವಿಶ್ವವಿದ್ಯಾಲಯದ ಅಧ್ಯಯನಾಂಗದ ಮೂಲಕ ನಡೆಯುವ ವಿವಿಧ ಸ್ನಾತಕೋತ್ತರ ಮತ್ತು ಪಿಎಚ್.ಡಿ. ಕೋರ್ಸ್‌ಗಳ ವಾರ್ಷಿಕ ವೇಳಾಪಟ್ಟಿಯನ್ನು ಸಿದ್ಧಪಡಿಸಿ ನಿಗದಿಗೊಳಿಸಲಾಗಿದೆ. ಈ ಅಧಿಸೂಚನೆಯನ್ನು ಸಂಬಂಧಿಸಿದ ಕೋರ್ಸ್‌ಗಳ ಸಂಚಾಲಕರು/ಮುಖ್ಯಸ್ಥರು ಮತ್ತು ವಿದ್ಯಾರ್ಥಿಗಳು ಈ ಕೆಳಗಿನಂತೆ ಅನುಸರಿಸಲು ಸೂಚಿಸಿದೆ.

ಯೋಜನೆಗಳು: ಅಧ್ಯಯನ ವಿಭಾಗಗಳ ಪ್ರತಿಯೊಬ್ಬ ಪ್ರಾಧ್ಯಾಪಕರು ವೈಯಕ್ತಿಕ ಹಾಗೂ ಆಯಾ ವಿಭಾಗದ ಎಲ್ಲಾ ಪ್ರಾಧ್ಯಾಪಕರು ಕೂಡಿ ಸಾಂಸ್ಥಿಕ ನೆಲೆಯಲ್ಲಿ ಪ್ರತಿವರ್ಷ ಎರಡು ಯೋಜನೆಗಳನ್ನು ನಿರ್ವಹಿಸುತ್ತಾರೆ. ವಿಭಾಗಗಳ ಅಧ್ಯಯನ ಮಂಡಳಿಗಳಿಗೆ ಆಯಾ ವಿಭಾಗದ ಹಿರಿಯ ಪ್ರಾಧ್ಯಾಪಕರು ಅಧ್ಯಕ್ಷರಾಗಿರುತ್ತಾರೆ. ವಿಭಾಗದ ಎಲ್ಲಾ ಪ್ರಾಧ್ಯಾಪಕರು ಸದಸ್ಯರಾಗಿರುತ್ತಾರೆ. ವಿಭಾಗಗಳ ಅವಶ್ಯಕತೆಗೆ ಅನುಗುಣವಾಗಿ ಬಾಹ್ಯ ವಿದ್ವಾಂಸರು, ಕ್ಷೇತ್ರ ತಜ್ಞರು ಅಧ್ಯಯನ ಮಂಡಳಿಯ ಸದಸ್ಯರಾಗಿರುತ್ತಾರೆ. ಅಧ್ಯಯನ ಮಂಡಳಿಯ ಅನುಮೋದನೆ ಪಡೆದ ಯೋಜನಾ ಪ್ರಸ್ತಾವನೆಗಳನ್ನು ವಿಭಾಗವು ಅಧ್ಯಯನಾಂಗದ ಮುಖಾಂತರ ಆಡಳಿತಾತ್ಮಕ ಅನುಮೋದನೆ ಪಡೆದುಕೊಳ್ಳುತ್ತದೆ. ಮುಕ್ತಾಯಗೊಂಡ ಯೋಜನೆಗಳನ್ನು ವಿಭಾಗಗಳು ಮತ್ತೊಮ್ಮೆ ಅಧ್ಯಯನ ಮಂಡಳಿಯ ಶಿಫಾರಸ್ಸಿನೊಂದಿಗೆ ಅಧ್ಯಯನಾಂಗಕ್ಕೆ ಸಲ್ಲಿಸುತ್ತವೆ. ಹೀಗೆ ಸಲ್ಲಿಕೆಯಾದ ಯೋಜನೆಗಳನ್ನು ಕುಲಪತಿಯವರ ಅನುಮೋದನೆಯೊಂದಿಗೆ ಅಧ್ಯಯನಾಂಗವು ಪ್ರಕಟಣೆಗಾಗಿ ಪ್ರಸಾರಾಂಗಕ್ಕೆ  ಸಲ್ಲಿಸುತ್ತದೆ.

ಕೋರ್ಸ್‌ಗಳು: ಅಧ್ಯಯನಾಂಗವು ಪಿಎಚ್.ಡಿ., ಡಿ.ಲಿಟ್., ಎಂ.ಫಿಲ್, ಎಂ.ಎ.ಪಿಎಚ್.ಡಿ. (ಕನ್ನಡ ಸಂಯೋಜಿತ ಪದವಿ), ಎಂ.ವಿ.ಎ. ಎಂ.ಮ್ಯೂಜಿಕ್, ಬಿ.ಮ್ಯೂಜಿಕ್ ಹಾಗೂ ನಾಟಕ ಡಿಪ್ಲೊಮಾ, ಕನ್ನಡ ಭಾಷಾಧ್ಯಯನ ಸ್ನಾತಕೋತ್ತರ ಡಿಪ್ಲೋಮಾ, ಪತ್ರಿಕೋಧ್ಯಮ ಸ್ನಾತಕೋತ್ತರ ಡಿಪ್ಲೊಮಾ ಕೋರ್ಸ್‌ಗಳನ್ನು ನಿರ್ವಹಿಸುತ್ತದೆ. ಈ ಎಲ್ಲಾ ಕೋರ್ಸ್‌ಗಳ ಪಠ್ಯಕ್ರಮ, ಪ್ರವೇಶ ಪ್ರಕ್ರಿಯೆ, ಪರೀಕ್ಷೆ ಮತ್ತು ಮೌಲ್ಯಮಾಪನ, ಫಲಿತಾಂಶ ಪ್ರಕಟಣೆ ಹಾಗೂ ಅಂಕಪಟ್ಟಿ ನಿರ್ವಹಣೆಯನ್ನು ಮಾಡುತ್ತದೆ. ಎಲ್ಲಾ ಕೋರ್ಸ್‌ಗಳ ಪ್ರವೇಶ ಪ್ರಕಟಣೆಯನ್ನು ಸುದ್ಧಿ ಮಾಧ್ಯಮಗಳಲ್ಲಿ ಜಾಹೀರಾತು ನೀಡಲಾಗುವುದು. ವಿಶ್ವವಿದ್ಯಾಲಯ ಹಾಗೂ ಯು.ಜಿ.ಸಿ. ಅಂತರ್ಜಾಲದಲ್ಲಿಯೂ ಪ್ರಕಟಿಸಲಾಗುವುದು.

ಆಯಾ ವರ್ಷ ಖಾಲಿಯಿರುವ ಸೀಟುಗಳ ವಿವರವನ್ನು ವಿಭಾಗಗಳಿಂದ ಮಾಹಿತಿ ಪಡೆದು, ಯು.ಜಿ.ಸಿ. ನಿಯಮಾನುಸಾರ ಎಲ್ಲ ಕೋರ್ಸ್‌ಗಳ ಅಧ್ಯಯನಕ್ಕೆ ಸಾಮಾನ್ಯ ಪ್ರವೇಶ ಪರೀಕ್ಷೆ ಹಾಗೂ ಸಂದರ್ಶನದ ಮೂಲಕ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಲಾಗುವುದು.

ಆಯ್ಕೆ ಪಟ್ಟಿಯನ್ನು ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗುವುದು. ಅಗತ್ಯ ಶುಲ್ಕಗಳೊಂದಿಗೆ ನಿಗದಿಪಡಿಸಿದ ದಿನಾಂಕದೊಳಗಾಗಿ ವಿದ್ಯಾರಣ್ಯದಲ್ಲಿಯ ಕೋರ್ಸ್‌ಗಳಲ್ಲಿ ಪ್ರವೇಶ ಪಡೆಯುವ ಅಭ್ಯರ್ಥಿಗಳು ವಿವಿಧ ಅಧ್ಯಯನ ವಿಭಾಗಗಳಲ್ಲಿಯೂ, ಮಾನ್ಯತಾ ಕೇಂದ್ರಗಳಲ್ಲಿಯೂ ಹಾಗೂ ವಿಸ್ತರಣಾ ಕೇಂದ್ರಗಳಲ್ಲಿಯೂ ಪ್ರವೇಶ ಪಡೆಯಬಹುದು.

ಅಭ್ಯರ್ಥಿಯು ಸಂಶೋಧನೆಗೆ ಆರಿಸಿಕೊಳ್ಳುವ ವಿಷಯ ಕನ್ನಡ ಭಾಷೆ, ಕಲೆ, ಸಾಹಿತ್ಯ, ಸಂಸ್ಕೃತಿ, ಚರಿತ್ರೆ, ಸಮಾಜ, ಭಾಷಾಂತರ, ಅಭಿವೃದ್ಧಿ, ವಿಜ್ಞಾನ ಇತ್ಯಾದಿ ವಿಷಯಗಳಿಗೆ ಸಂಬಂಧಿಸಿರಬೇಕು.

ಕೋರ್ಸ್‌ವರ್ಕ್ (ಸಂಶೋಧನ ಕಮ್ಮಟ): ಪಿಎಚ್.ಡಿ. ಅಧ್ಯಯನಕ್ಕೆ ಆಯ್ಕೆಯಾದ ವಿದ್ಯಾರ್ಥಿಗಳಿಗೆ ನಾಲ್ಕು ಹಂತಗಳಲ್ಲಿ ಕೋರ್ಸ್‌ವರ್ಕ್‌ನ್ನು ನಡೆಸಲಾಗುತ್ತದೆ. ಕೊನೆಯ ಹಂತದ ಕೋರ್ಸ್‌ವರ್ಕ್‌ನ್ನು ಪ್ರತಿವರ್ಷ ಡಾ. ಶಂಬಾ ಜೋಶಿಯವರ ಜನ್ಮದಿನವಾದ ಜನವರಿ ೦೪ರಂದು ವಿಶ್ವವಿದ್ಯಾಲಯವು ’ಸಂಶೋಧನ ದಿನ’ವನ್ನಾಗಿ ಪರಿಗಣಿಸಿ ಶಂಬಾ ಜೋಶಿ ಅಧ್ಯಯನ ಪೀಠದ ಸಹಯೋಗದೊಂದಿಗೆ ಆಯೋಜಿಸಲಾಗುತ್ತದೆ. ನಂತರದಲ್ಲಿ ಕೋರ್ಸ್‌ವರ್ಕ್‌ನ ಲಿಖಿತ ಹಾಗೂ ಮೌಖಿಕ ಪರೀಕ್ಷೆ ನಡೆಸಿ ಉತ್ತೀರ್ಣರಾದ ವಿದ್ಯಾರ್ಥಿಗಳಿಗೆ ಕೋರ್ಸ್‌ವರ್ಕ್ ಅಂಕಪಟ್ಟಿಗಳನ್ನು ವಿತರಿಸಲಾಗುವುದು.

ನಿರ್ದೇಶಕರು: ಅಧ್ಯಯನಾಂಗದ ನಿರ್ದೇಶಕರು ಕುಲಪತಿಯವರಿಂದ ನಿಯೋಜಿಸಲ್ಪಟ್ಟಿರುತ್ತಾರೆ. ವಿಶ್ವವಿದ್ಯಾಲಯದ ಶೈಕ್ಷಣಿಕ ಕಾರ್ಯಕ್ರಮಗಳನ್ನು ಮೇಲುಪ್ರಾಧಿಕಾರದ ನಿರ್ದೇಶನದಲ್ಲಿ ನಿರ್ವಹಿಸುತ್ತಾರೆ. ಇದಕ್ಕೆ ಸಂಬಂಧಿಸಿದ ಆಡಳಿತಾತ್ಮಕ ನಿರ್ದೇಶನಗಳನ್ನು ಕುಲಸಚಿವರು ನೀಡುತ್ತಾರೆ. ಇದುವರೆಗೂ ಅಧ್ಯಯನಾಂಗದ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿದವರ ವಿವರ.

ಘಟಿಕೋತ್ಸವ: ಕನ್ನಡ ವಿಶ್ವವಿದ್ಯಾಲಯ ಘಟಿಕೋತ್ಸವವನ್ನು (Convocation) ನುಡಿಹಬ್ಬವೆಂದು ಆಚರಿಸಿಕೊಂಡು ಬರುತ್ತಿದೆ. ಈ ನುಡಿಹಬ್ಬದ ಆಚರಣೆಯಲ್ಲಿ ಅಧ್ಯಯನಾಂಗದ ಪಾತ್ರ ಪ್ರಮುಖವಾದುದು. ಘಟಿಕೋತ್ಸವಲ್ಲಿ ಡಿ.ಲಿಟ್, ಪಿಎಚ್.ಡಿ., ಎಂ.ಫಿಲ್. ಪದವಿ ಹಾಗೂ ಆಯಾ ಸ್ನಾತಕೋತ್ತರ ಪದವಿ ಪಡೆದ ಪದವೀಧರರಿಗೆ ಪ್ರಮಾಣ ಪತ್ರಗಳನ್ನು ಪ್ರದಾನ ಮಾಡುವ ಎಲ್ಲ ಶೈಕ್ಷಣಿಕ ಜವಬ್ದಾರಿಯನ್ನು ಅಧ್ಯಯನಾಂಗವು ನಿರ್ವಹಿಸುತ್ತದೆ. ಜೊತೆಗೆ ನುಡಿಹಬ್ಬದಲ್ಲಿ ಕನ್ನಡ ಭಾಷೆ, ಕರ್ನಾಟಕ ಕಲೆ, ಸಂಸ್ಕೃತಿಗಳ ಏಳಿಗೆಗಾಗಿ ದುಡಿದ ಮಹನೀಯರನ್ನು ಗುರುತಿಸಿ ಅವರಿಗೆ ’ನಾಡೋಜ’ ಎಂಬ ಗೌರವ ಪದವಿಯನ್ನು ನೀಡುತ್ತಾ ಬಂದಿದೆ. ಆದಿಕವಿ ಪಂಪನಿಗೆ ಈ ನಾಡವರು ಗೌರವ ಸೂಚಕವಾಗಿ ಸಂಬೋಧಿಸಿದ ’ನಾಡೋಜ’ ಎಂಬ ಬಿರುದನ್ನು ಕರ್ನಾಟಕ ಪರಂಪರೆಯ ಸಾತತ್ಯವನ್ನು ಹಾಗೂ ನಾಡು ನುಡಿಗೆ ಸಲ್ಲಿಸಿದ ಸೇವೆಯನ್ನು ಪರಿಗಣಿಸಿ ನಾಡೋಜ ಗೌರವ ಪದವಿ ನೀಡಲಾಗುವುದು. ಈ ಗೌರವ ಪದವಿ ಪ್ರದಾನ ಸಮಾರಂಭದ ಕಾರ್ಯಚಟುವಟಿಕೆಯನ್ನು ಅಧ್ಯಯನಾಂಗವು ನಿರ್ವಹಿಸುತ್ತದೆ.

ನಾಡೋಜ ಗೌರವ ಪುರಷ್ಕಾರ : ಕನ್ನಡ ವಿಶ್ವವಿದ್ಯಾಲಯವು ಪ್ರತಿವರ್ಷ ಆಚರಿಸುವ ’ನುಡಿಹಬ್ಬ’ದಲ್ಲಿ ಕನ್ನಡ ಭಾಷೆ, ಕರ್ನಾಟಕ ಕಲೆ, ಸಂಸ್ಕೃತಿಗಳ ಏಳಿಗೆಗಾಗಿ ದುಡಿದ ಮಹನೀಯರನ್ನು ಗುರುತಿಸಿ ಅವರಿಗೆ ’ನಾಡೋಜ’ ಎಂಬ ಗೌರವ ಪದವಿಯನ್ನು ನೀಡುತ್ತಾಬಂದಿದೆ. ಆದಿಕವಿ ಪಂಪನಿಗೆ ಈ ನಾಡವರು ಗೌರವ ಸೂಚಕವಾಗಿ ಸಂಬೋಧಿಸಿದ ’ನಾಡೋಜ’ ಎಂಬ ಬಿರುದನ್ನು ಕರ್ನಾಟಕ ಪರಂಪರೆಯ ಸಾತತ್ಯವನ್ನು ಹಾಗೂ ನಾಡು ನುಡಿಗೆ ಸಲ್ಲಿಸಿದ ಸೇವೆಯನ್ನು ಪರಿಗಣಿಸಿ ನಾಡೋಜ ಗೌರವ ಪದವಿ ನೀಡಲಾಗುವುದು.