dravidian-studies

 

೧೯೯೪-೯೫ನೇ ಶೈಕ್ಷಣಿಕ ವರ್ಷದಲ್ಲಿ ಅಸ್ತಿತ್ವಕ್ಕೆ ಬಂದ ವಿಭಾಗವು ಆರಂಭದಲ್ಲಿ ವಿದೇಶೀ ಮತ್ತು ಭಾರತೀಯ ಭಾಷೆಗಳ ವಿಭಾಗ ಎಂಬ ಹೆಸರಿನಿಂದ ಕಾರ್ಯ ನಿರ್ವಹಿಸುತ್ತಿತ್ತು. ಮುಂದೆ ೧೯೯೮-೯೯ನೇ ಶೈಕ್ಷಣಿಕ  ವರ್ಷದಲ್ಲಿ ದ್ರಾವಿಡ ಸಂಸ್ಕೃತಿ ಅಧ್ಯಯನ ವಿಭಾಗವೆಂದು ಮರುನಾಮಕರಣಗೊಂಡು, ಹೊಸ ಸ್ವರೂಪ ಮತ್ತು ಧ್ಯೇಯೊದ್ದೇಶಗಳೊಂದಿಗೆ ಕಾರ್ಯ ನಿರ್ವಹಿಸತೊಡಗಿತು. ಆರಂಭದಲ್ಲಿ ಭಾಷೆ ಮತ್ತು ಸಂಸ್ಕೃತಿ, ಸಾಹಿತ್ಯ ಅಧ್ಯಯನಗಳಿಗೆ ಸೀಮಿತವಾಗಿದ್ದ ವಿಭಾಗದ ಶೈಕ್ಷಣಿಕ ಚಟುವಟಿಕೆಗಳು ನಂತರದಲ್ಲಿ ದ್ರಾವಿಡ ಅಧ್ಯಯನ ಹಾಗೂ ದಕ್ಷಿಣ ಭಾರತ ಅಧ್ಯಯನ ಕ್ಷೇತ್ರಗಳಿಗೆ ವಿಸ್ತರಿಸಿಕೊಂಡು, ದ್ರಾವಿಡ ಭಾಷೆ, ಸಾಹಿತ್ಯ, ಸಂಸ್ಕೃತಿಗೆ ಸಂಬಂಧ ಪಟ್ಟ ಪ್ರತ್ಯೇಕ ಅಧ್ಯಯನಗಳೂ, ತೌಲನಿಕ ಅಧ್ಯಯನಗಳೂ ಯೋಜನೆಗಳಾಗಿ ಕಾರ್ಯರೂಪಕ್ಕೆ ಬಂದುವು.

ಇಂತಹ ಅಧ್ಯಯನಗಳನ್ನು ಕೈಗೊಳ್ಳುವುದರ ಜತೆಗೆ ಪ್ರಸ್ತುತ ಅಧ್ಯಯನಗಳಿಗೆ ಪೂರಕವಾದ ಆಕರಗಳನ್ನು ನಿರ್ಮಾಣ ಮಾಡುವ ಕಾರ್ಯದಲ್ಲೂ ವಿಭಾಗವು ನಿರತವಾಗಿದೆ. ವಿಭಾಗವು ಕೈಗೊಂಡ ’ದ್ರಾವಿಡ ಭಾಷಾ ಅನುವಾದ ಕೃತಿ ಸೂಚಿ’, ’ದ್ರಾವಿಡ ನಿಘಂಟು’, ’ದ್ರಾವಿಡ ಸಾಹಿತ್ಯ ಚರಿತ್ರೆ’ ಮುಂತಾದ ಯೋಜನೆಗಳೇ ಇದಕ್ಕೆ ಸಾಕ್ಷಿಯಾಗಿವೆ. ವಿಭಾಗವು ಆಯೋಜಿಸುತ್ತ ಬಂದಿರುವ ವಿಚಾರ ಸಂಕಿರಣ ಮತ್ತು ಕಮ್ಮಟಗಳೂ ಕೂಡಾ  ಅದರ ಒಟ್ಟಾರೆ ಪರಿಕಲ್ಪನೆ ಹಾಗೂ ಆಶಯಗಳಿಗೆ ಪೂರಕವಾಗಿವೆ. ದೇಶದ-ಅದರಲ್ಲೂ ವಿಶೇಷವಾಗಿ ದಕ್ಷಿಣ ಭಾರತದ ವಿವಿಧ ವಿಶ್ವವಿದ್ಯಾಲಯಗಳ ಸಹಯೋಗದೊಂದಿಗೆ ಹಮ್ಮಿಕೊಂಡ ಇಂತಹ ವಿಚಾರ ಸಂಕಿರಣಗಳು ಭಾಷೆ, ಸಾಹಿತ್ಯ, ಸಂಸ್ಕೃತಿಗಳ ಶೈಕ್ಷಣಿಕ ಸಂಬಂಧಗಳನ್ನು ವಿಸ್ತರಿಸಿವೆ. ದ್ರಾವಿಡ ಹಾಗೂ ದಕ್ಷಿಣ ಭಾರತದ ಭಾಷೆ, ಸಾಹಿತ್ಯ, ಸಂಸ್ಕೃತಿಗಳ ಪರಸ್ಪರ ತೌಲನಿಕ ಅಧ್ಯಯನಗಳಿಗೂ ವೇದಿಕೆಯಾಗಿವೆ.

ಅಧ್ಯಯನ ಚಟುವಟಿಕೆಗಳಿಗೆ ಪೂರಕವಾಗಿ ಬೋಧನೆ ಮತ್ತು ಪ್ರಕಟಣೆಗಳಲ್ಲೂ ವಿಭಾಗವು  ತೊಡಗಿಸಿಕೊಂಡಿದೆ. ಎಂ.ಎ.ಪಿಎಚ್.ಡಿ, ಎಂ.ಫಿಲ್ ಮತ್ತು ಪಿಎಚ್.ಡಿ. ಕೋರ್ಸಗಳಲ್ಲಿ ವಿಭಾಗದ ಸಕ್ರಿಯ ಪಾಲ್ಗೊಳ್ಳುವಿಕೆ ಇದೆ. ವಿಭಾಗದ ಮೂಲಕ ಇದುವರೆಗೆ ೧೯ ಮಂದಿ ಎಂ.ಫಿಲ್ ಪದವಿಗಳನ್ನೂ, ೩೫ ಮಂದಿ ಪಿಎಚ್.ಡಿ. ಪದವಿಗಳನ್ನೂ ಪಡೆದಿದ್ದಾರೆ. ವಿಭಾಗದ ಹಲವಾರು ಯೋಜನೆಗಳು ವಿಶ್ವವಿದ್ಯಾಲಯದ ಪ್ರಸಾರಾಂಗದ ಮೂಲಕ ಪುಸ್ತಕ ರೂಪದಲ್ಲಿ ಪ್ರಕಟವಾಗಿವೆ. ದ್ರಾವಿಡ ಅಧ್ಯಯನ ಎಂಬ ಅರ್ಧವಾರ್ಷಿಕ ಪತ್ರಿಕೆಯನ್ನು ವಿಭಾಗವು ೧೦ ವರ್ಷಗಳ ಕಾಲ ನಿಯತವಾಗಿ ಪ್ರಕಟಿಸಿದೆ. ಇದುವರೆಗೆ ಅಂತಹ ಒಟ್ಟು ೨೦ ಸಂಚಿಕೆಗಳು ಹೊರಬಂದಿವೆ. ಈ ಎಲ್ಲಾ ಶೈಕ್ಷಣಿಕ ಚಟುವಟಿಕೆಗಳ ಯಶಸ್ವೀ ನಿರ್ವಹಣೆಗೆ ಅವಶ್ಯವೆಂಬಂತೆ ಕನ್ನಡ, ತುಳು, ತಮಿಳು, ತೆಲುಗು, ಮಲಯಾಳಂ, ಕೊಡವ, ಸಂಸ್ಕೃತ, ಇಂಗ್ಲಿಷ ಮುಂತಾದ ಭಾಷೆಗಳಲ್ಲಿ ಪರಿಣತಿಯುಳ್ಳ ಅಧ್ಯಾಪಕರ ತಂಡವು ವಿಭಾಗದಲ್ಲಿದೆ. ಮುಂದಿನ ದಿನಗಳಲ್ಲಿ ತನ್ನ ಅಧ್ಯಯನ ಪರಿಧಿಯನ್ನು ’ದ್ರಾವಿಡ-ದಕ್ಷಿಣ ಭಾರತ’ ಪರಿಕಲ್ಪನೆಯ ಮೂಲಕ ’ದಕ್ಷಿಣ ಏಷ್ಯ’ ಕ್ಷೇತ್ರಕ್ಕೆ ವಿಸ್ತರಿಸಿಕೊಳ್ಳುವ ದೃಷ್ಟಿಕೋನ ವಿಭಾಗಕ್ಕಿದೆ.

ಮುನ್ನೋಟ

ವಿಭಾಗದ ಪ್ರಧಾನ ಆಶಯವು ನಿರ್ದಿಷ್ಟವಾಗಿ ದಕ್ಷಿಣ ಭಾರತದ ನೆಲೆಯಲ್ಲೂ, ವಿಸ್ತೃತವಾಗಿ ದಕ್ಷಿಣ ಏಷ್ಯಾದ ನೆಲೆಯಲ್ಲೂ ಅಧ್ಯಯನ ನಡೆಸುವುದಾಗಿದೆ. ವಿಭಾಗದ ಸದಸ್ಯರು ತಮಿಳು, ಮಲಯಾಳಂ, ತುಳು, ಕೊಡವ, ತೆಲುಗು ಹಾಗೂ ಸಂಸ್ಕೃತ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಪರಿಣತಿ ಪಡೆದಿದ್ದಾರೆ. ದಕ್ಷಿಣ ಭಾರತದ ವ್ಯಾಪ್ತಿಯಲ್ಲಿ ಬರುವ ಎಲ್ಲ ಭಾಷೆ ಮತ್ತು ಸಂಸ್ಕೃತಿಗಳೊಂದಿಗೆ ವಾಗ್ವಾದ ನಡೆಸುವುದಕ್ಕೆ ಇದು ಸಹಕಾರಿಯಾಗಿದೆ. ವಿಚಾರ ಸಂಕಿರಣಗಳು, ಸಂಶೋಧನೆಗಳು, ಮತ್ತು ಯೋಜನೆಗಳನ್ನು ಕೈಗೊಳ್ಳುವುದರ ಮೂಲಕ ದಕ್ಷಿಣ ಭಾರತದಲ್ಲಿರುವ ಭಾಷಾತಡೆಗೋಡೆಯನ್ನು ದಾಟುವ ಪ್ರಯತ್ನವನ್ನೂ ವಿಭಾಗವು ನಿರಂತರವಾಗಿ ಮಾಡುತ್ತ ಬಂದಿದೆ. ಕನ್ನಡ ಜೊತೆಗೆ ಇತರ ದ್ರಾವಿಡ ಭಾಷೆ, ಸಾಹಿತ್ಯ ಮತ್ತು ಸಂಸ್ಕೃತಿಯೊಂದಿಗೆ ವಿಭಾಗವು ಅನುಸಂಧಾನ ಮಾಡುತ್ತ ಬಂದಿದೆ. ಈ ಹಿನ್ನೆಲೆಯಲ್ಲಿ ವಿಚಾರ ಸಂಕಿರಣ ಯೋಜನೆಗಳು, ಕಮ್ಮಟಗಳ ಮೂಲಕ ಪ್ರಯತ್ನವನ್ನು ಮುಂದುವರೆಸಿದೆ. ದ್ರಾವಿಡ ಭಾಷೆ ಮತ್ತು ಸಾಹಿತ್ಯವನ್ನು ಕನ್ನಡದಲ್ಲಿ ಕೊಡುವುದು ವಿಭಾಗದ ಇನ್ನೊಂದು ಪ್ರಮುಖ ಆದ್ಯತೆ. ಅಂದರೆ ಕನ್ನಡದಲ್ಲಿ ಆಕರ ನಿರ್ಮಾಣ.                              ಹೆಚ್ಚಿನ ಓದು

shade

 

ವಿಭಾಗದ ಬೋಧಕರ ವಿವರಗಳು

ಹೆಸರು
ಹುದ್ದೆ
ವಿದ್ಯಾರ್ಹತೆ
ಹೆಚ್ಚಿನ ವಿವರ
ಡಾ. ಎ. ಸುಬ್ಬಣ್ಣ ರೈ
ಪ್ರಾಧ್ಯಾಪಕರು ಮತ್ತು ಮುಖ್ಯಸ್ಥರು
ಪಿಎಚ್.ಡಿ.
ಹೆಚ್ಚಿನ ವಿವರ
ಡಾ. ಕೆ.ಕೆ.ಮಾಧವ
ಪ್ರಾಧ್ಯಾಪಕರು
ಪಿಎಚ್.ಡಿ.
ಹೆಚ್ಚಿನ ವಿವರ
ಸಿ.ವೆಂಕಟೇಶ
ಸಹ ಪ್ರಾಧ್ಯಾಪಕರು
ಪಿಎಚ್.ಡಿ.
ಹೆಚ್ಚಿನ ವಿವರ
ಡಾ. ಸುಚೇತ ನವರತ್ನ
ಸಹಾಯಕ ಪ್ರಾಧ್ಯಾಪಕರು, ಪ್ರಾಧ್ಯಾಪಕರು
ಪಿಎಚ್.ಡಿ.
ಹೆಚ್ಚಿನ ವಿವರ